好似好耐都冇好似宜家連續凍到咁多日啦，雖然終於重拾左久違嘅冬天感覺，不過相信對於唔少女仔來講，冬天絕對係個令人又愛又恨嘅季節啊！雖然咁凍嘅冬天感覺超浪漫，但係令人完全失去左搭配衫嘅興致啊！
不過係街上仲係可以見到好多「愛靚唔愛命」嘅女生仲係著短裙、絲襪完全唔怕，但係睇嚟各位媽媽們唔可以再話女兒唔著衫啦，因為原來係冬天著得少可以減肥啊！著得少又靚又可以減肥？澳洲就有研究發現，咁凍嘅天氣絕對有助人體燃燒體內嘅脂肪～
係低溫15度以下，人體係凍到發抖嘅時候，肌肉組織會釋放「鳶尾素」同FGF21 兩種可以消耗囤積嘅脂肪荷爾蒙，尼個時候 10 分鐘所燃燒嘅脂肪甚至相等於運動 1 個鐘！雖然聽起嚟絕對係個自虐嘅概念，不過事實上仲幾抵嘅！
簡單來講，人體內嘅脂肪分為啡色脂肪同白色脂肪2種，而啡色脂肪裡含有一種物質，可以有助分解致肥嘅元兇－白色脂肪！咁點解著得少可以減肥呢？咁係因為係低溫嘅環境之下，更有助活化啡色脂肪同促進啡色脂肪嘅形成～所以當體內嘅啡色脂肪含量上升，致肥嘅白色脂肪就自然可以更快速咁被分解啦！
Obesity 雜誌曾經刊登過日本嘅一項研究，研究邀請左13名年齡介乎20至28歲嘅男仔，測驗要求佢哋係淨係著單薄嘅衫於 19℃ 嘅低溫下逗留兩個鐘，結果發現比起著有足夠保暖衣物嘅人，佢哋嘅啡色脂肪更呈現活化現象，更比正常人額外燃燒多410 kcal，升幅達3成以上！
如果你想減肥成功嘅話，最好就係將體內嘅白色脂肪「棕色化」！日內瓦大學（University of Geneva）早前就發表過一項以老鼠為測驗對象嘅研究，研究將老鼠放係有攝氏6度嘅環境10天，結果發現老鼠體內嘅白色脂肪會棕化，而且燃燒脂肪嘅速度都會加強！
如果各位女生們可以抵擋寒冷低溫嘅話，著得少一啲好似真係可以有助燃燒脂肪！不過對於超怕凍的人來講，都係乖乖靠運動減肥好啦～